GENERAL SANTOS CITY – Patung patong nga kaso ang atubangon sa magtutudlo nga gireklamo nga nangmolestiya sa iyang estudyante kon ugaling mapamatud-an nga sad-an.
Sa pakighinabi sa Bombo Radyo, gibutyag ni Atty. Rogelio Garcia, inilang abogado sa dakbayan nga mamahimong makasuhan og child abuse, kasong administratibo og kriminal ang gireklamong magtutudlo nga nagtudlo sa General Santos City High School sa Calumpang ning dakbayan.
Gibutyag ni Atty. Garcia, sa kasong administratibo,pwedeng matangtang sa iyang pagkamaestro kon ugaling mapamatud-ang sad-an samtang mapriso kon madutlan sa kasong kriminal nga ipasaka batok niini.
Tambag sa abogado sa mga ginikana nga iduso ang pagpasang-at ug kaso batok sa magtutudlo samtang ireport sa DSWD ang nahitabo ang mahatagan ug counselling ang ilang anak nga natrauma matud pa human sa panghitabo.
Angayang adunay lig-ong ebidensiya aron mapapriso ang suspek.
Nasayran nga gireklamo sa 15 anyos ang iyang magtutudlo nga si Jonathan Esal human matud pa siya gimolestiya.
