Ilakip na si kanhi Presidential spokesperson Harry Roque sa mga indibidwal nga imbestigaran sa Presidential Anti-Organized Crime Commission (PAOCC).
Kalabotan kini sa duha ka foreigners nga nadakpan sa usa ka balay sa Tuba, Benguet human sa raid sa otoridad tungod sa gibutyag nga koneksyon sa illegal Philippine offshore gaming operators (POGO).
Si Usec. Gilbert Cruz mao ang nagkumpirma nga imbestigaran nila si Roque bisan pa nga gipanghimakak niini nga siya ang tag-iya sa balay, apan giangkon nga adunay interes siya sa korporasyon nga nagapanag-iya niini.
Una na nga gipaklaro ni Roque sa atubang sa Senado nga nag-istar siya matuod sa maong balay dihang mibiya na siya sa trabaho sa gobyerno, apan as of January 2024 sumala sa nahisgotan, gipa-arkilahan kini sa korporasyon sa usa ka Chinese national nga nagpanganlan og Wan Yun.
Dihang gi-require kini nga magpirma og contract of lease sumala pa kang Roque, gi-require kini nga magpakita og alien certificate of registration og migawas nga kini nga Chinese national ang holder sa 9G working visa nga buot pasabot adunay kinamatarong kini nga magtinir sa Pilipinas.
Kahibaluan nga sa maong law enforcement operation sa Tuba ang tuyo unta mao nga dakpon ang Chinese woman nga na-link sa Pogo hub sa Bamban, Tarlac.
Wala nadakpan ang maong babaye, apan natigayon nga naaresto sa government agents ang Chinese national nga si Wang Keping, 35 anyos og ang iyang Cambodian nga kauban nga si Khuon Moeurn, 37.
Sa ulahi, giklaro ni Senator Risa Hontiveros nga dili Cambodian national ang nadakpan sa maong balay kun dili usa ka pugante nga Chinese.
Peke sumala sa senadora ang Cambodian passport nga gihuptan sa lalaki, og base sa impormasyon, usa kini ka red notice fugitive, “very” high-level, og nakapanunto na sa 100,000 ka mga tawo.
