Gidunggab sa usa ka Grade 11 student ang usa ka Grade 8 student alas 8:50 sa buntag sulod mismo sa Buayan National High School sa Purok 1, Barangay Buayan, General Santos City.
Ang suspek, nga giila sa alyas nga “Alex,” residente sa maong barangay, gilayon nga nadakpan sa mga security guard sa eskwelahan ug giturn-over sa mga miresponde nga kapulisan. Gikustodiya na siya karon sa Police Station 3.
Samtang, giila ang biktima sa alyas nga “Jan-Jan,” 15 anyos ug residente usab sa Barangay Buayan. Nakasinati kini og mga samad sa tuo nga bahin sa liog ug tiyan human gidunggab gamit ang balisong.
Gilayon nga girespondehan sa kapulisan ang insidente human makadawat og tawag kabahin niini. Naabtan ang biktima nga nagkadugo ug gidala sa usa ka pribadong ospital alang sa pagpatambal.
Nasayran nga bullying ang gitan-aw nga posibleng hinungdan sa nahitabong pagpanunggab.
Narekober gikan sa suspek ang usa ka balisong nga gibana-banang lima ka pulgada ang gitas-on.
Padayon ang imbestigasyon sa kapulisan aron matino ang tinuod nga motibo sa pagpanunggab ug ang uban pang detalye sa maong insidente
