Gipamatud-an sa Gobyerno sa Pilipinas o GPH ug Moro Islamic Liberation Front o MILF ang ilang commitment nga hingpit nga ipatuman ang Comprehensive Agreement on the Bangsamoro o CAB, lakip ang pagpadayon sa mga kalihokan ubos sa Normalization.
Gipahibalo kini human sa ika-38 nga tigom sa GPH-MILF Peace Implementing Panels nga gipahigayon niadtong Martes, Agosto 4, sa Davao City.
Sa maong tigom, nagpagawas ang duha ka panig og Joint Statement ug mipirma sa Declaration of Continuity of the Partnership aron masiguro nga magpadayon ang implementasyon sa CAB bisan pa og adunay kausaban sa liderato o mahitabo ang political transition.
Nasulat sa deklarasyon nga magpadayon pag-usab ang hiniusang mga tigom sa mga mekanismo ug technical working groups sa GPH ug MILF, ug palig-onon ang pagtuman sa mga nahibiling commitment ubos sa kasabutan pangkalinaw.
Matod ni GPH Peace Implementing Panel Chair Secretary Mel Senen Sarmiento, dili lamang sa kadugayon sa kasabutan masukod ang kalampusan niini, kondili sa konkretong epekto sa peace process sa kinabuhi sa mga lumulupyo.
Gipasiugda usab ni Sarmiento nga kinahanglan mabati sa mga komunidad ang kalinaw pinaagi sa konkretong mga kausaban, samtang iyang giingon nga magkadugtong ang political ug Normalization tracks sa CAB.
Samtang, matod ni MILF Peace Implementing Panel Chair Mohagher Iqbal, nakasalig sa hingpit nga pagtuman sa mga commitment ubos sa CAB ang dugayng kalig-on ug kalinaw sa Bangsamoro.
Ubos sa Declaration of Continuity, nagkauyon usab ang duha ka panig nga magpahigayon og special meeting sa Kuala Lumpur, Malaysia nga giplanong ipahigayon sa Septyembre ning tuiga, aron mas mapalig-on ang ilang koordinasyon ug mapadayon ang mga kalampusan nga nakab-ot sa peace process.
