SARANGANI PROVINCE – Nag-atubang og kasong graft and plunder si Sarangani Governor Rogelio Pacquiao human nakadawat og pormal nga reklamo ang Office of the Ombudsman niadtong Miyerkules, may kalabotan sa giingong anomalosong mga kontrata sa procurement nga nagkantidad og kapin sa P167 milyones.
Ang reklamo gisang-at sa Task Force Kasanag (TFK), usa ka civil society watchdog group. Matod ni John Chiong, representante sa TFK, nagsugod ang imbestigasyon human sila makadawat og tip gikan sa usa ka concerned citizen niadtong Enero 2025.
Ang ilang ebidensiya nagbutyag sa giingong overpricing ug kakuwang sa feasibility studies, ilabi na sa pagpalit og 145 ka Honda XRM nga motorsiklo nga nagkantidad og P99,950 matag usa.
Lakip sa nahisgutang transaksiyon ang pagpalit og upat ka Komatsu D65EX-16 bulldozers nga nagkantidad og P119.99 milyones, ug hydraulic excavator nga nagkantidad og P47.99 milyones.
Sa reklamo, gipasanginlan si Gobernador Pacquiao sa paggamit sa iyang posisyon sa paghimo og mga transaksyon nga giingong nakalapas sa Republic Act No. 7080 (Plunder Law), diin ang giingong kinawat nga bahandi milapas sa P50 milyones.
Wala pay pamahayag si Gob. Pacquiao sa mga alegasyon samtang padayong giproseso ang kaso.
