Nipasalig ang Palasyo sa Malacañang nga dunay giandam nga contingency plan ang kagamhanan sa higayon nga mograbe ang tensiyon sa Middle East, partikular na ang giyera karon tali sa Iran ug Israel, nga dako ang posibilidad nga mosaka ang presyo sa krudo ug bisan abono sa nasud.
Matod ni Palace Press Officer USec. Claire Castro, ang Department of Energy (DOE) hugot nga nagmonitor sa sitwasyon sa Middle East.
Matud pa ni Castro nga kon mograbe ang kahimtang sa Middle East ug mosaka ang presyo sa lana, seguraduhon sa kagamhanan nga makahatag kini og hinabang alang sa pampublikong sakyanan ug bisan sa mga mananagat nga maapektuhan sa pagsaka sa presyo sa lana.
Matud ni Castro nga gipasabot ni DOE OIC Sharon Garin nga obligado ang mga kompaniya sa lana nga adunay 30 ka adlaw nga imbentaryo sa gasolina.
Kun moabot sa $80 matag baril ang presyo sa krudo, matod niya, aduna nay fuel subsidy o hinabang nga andam alang niadtong anaa sa sektor sa transportasyon ug bisan sa mga mag-uuma.
Ang DOE gikatahong andam usab nga makig-estorya sa mga kompaniya sa lana aron ipakatap ang adjustment sa presyo sa mga produktong petrolyo.
Maapektuhan usab ang suplay sa abono sa nasud kung magpadayon ang tensyon tali sa Iran ug Israel tungod kay motaas ang presyo sa abono sa lokal nga merkado.
Nasayran nga 66% sa importasyon sa abono sa nasod kay nitrogen-based ug ang nag-unang supplier mao ang Qatar.
Gipahibalo ni USec Castro. base sa iyang komunikasyon kang DA Secretary Francisco Tiu Laurel nga gawas sa Qatar, nakakita sila og laing supplier og abono ug kini mao ang Brunei.
