GENERAL SANTOS CITY – Andam si City PNP Director Col. Aden Lagradante nga dakpon ang mga gikasuhan kalabutan sa isyu sa PPM kun Police Paluwagan Movement kung adunay mugawas nga warrant of arrest.
Kini ang reaksyon sa opisyal sa report nga nagdesisyon na ang prosekusyon nga may probable cause ang syndicated estafa nga gipasang-at batuk sa mga nalambigit sa nasampit nga investment scam.
Matud ni Col. Lagradante nga ang mga high ranking PNP officers nga gitudlo nga may kalambigtan sa isyu anaa sa Camp Crame karon og anaa sa floating status.
Samtang ang uban pulis nga mubo ang ranggo nagpabilin sa ilang mga assignments. Sa pahayag ni Col. Lagradante, nagpadayon pang gipangita ang missing nga pulis nga nalambigit sa P2 billion investment scam kung asa gikaingong halos tanang mga pulis sa Rehiyon dose ang nabiktima.
Ang mga respondents sa Planpromatrix Online Company o mas ilado nga Police Paluwagan Movement dinhi sa Gensan mao silang Sheila Grace Galino Agustin, nga taga Koronadal South Cotabato, Eugene Aguinaldo Naungayan nga taga Fatima Uhaw, Hyacinth Joy Dollete Salva nga taga Sultan Kudarat, Rodolfo Ringon, taga Labangal Gensan, P/Corporal Rhodora Prieto Bombita nga taga City Heights Gensan, Elizabeth Isidto nga taga Bulaong Avenue Gensan, PO1 Venuz Amor Clavecilla nga taga Bulaong Avenue, P/Corporal Ernie Semino nga taga San Isidro, Gensan ug Cheryll Semino nga residente sa maong lugar.
Kahibaluan nga mukabat sa halos P2 Billion ang nalambigit sa maong investment scam nga PPM.
