Nanawagan si General Santos City Mayor Lorelie Geronimo Pacquiao sa mga residente nga apektado sa pagbaha nga unahon ang ilang kaluwasan ug dili magpagahi ug ulo atol sa padayon nga kusog nga pag-ulan.
Matud sa mayor, kon adunay ipagawas nga evacuation advisory gikan sa lokal nga panggamhanan ug sa mga disaster response agencies, kinahanglan kini nga sundon dayon aron malikayan ang posibleng peligro sa kinabuhi.
Ang maong panawagan miabot human misaka ang tubig-baha sa pipila ka bahin sa Barangay Labangal ug Purok Puting Bato, Barangay Calumpang, diin kusog ang bul-og sa tubig sa baha tungod sa pag-ulan.
Gipasiugda usab ni Mayor Pacquiao nga mas bililhon ang kinabuhi kaysa sa materyal nga mga butang, busa gihangyo niya ang mga residente nga makigtambayayong sa mga awtoridad ug mobalhin dayon ngadto sa luwas nga lugar kon adunay mando sa panghikling.
Padayon usab ang pagmonitor sa City Disaster Risk Reduction and Management Office (CDRRMO) sa sitwasyon sa mga apektadong lugar aron masiguro ang kaluwasan sa katawhan ug ang paspas nga paghatag og responde sa mga nanginahanglan. __
