GENSAN- Gibutyag ni Orly Sabelita, chairman sa Gensan Federation of Transport Cooperatives nga ang mga gipanghatag sa gobyerno sama sa libreng sakay ug mga cash card o fuel discount programs anaa pa sa pilot testing ug sa NCR pa lamang kini ipatuman, busa wala pa makabenepisyo ang ilang sektor sa rehiyon.
Sumala kaniya, ang gitawag nga ₱10 nga diskwento sa gasolina limitado lamang sa 150 litros kada semana, nga bugti og ₱1,500 nga tipid, apan giingon niya nga dili gihapon kini igo kon itandi sa sobra ka taas nga gasto sa krudo.
Gipasabot usab niya nga ang kita sa pamasahe dili makasakop sa aktuwal nga konsumo sa gasolina tungod sa kapin 100% nga pagsaka sa presyo.
Gisaway usab sa grupo ang Service Contracting Program sa LTFRB kay ang ilang computation kuno wala naangay sa kasamtangang sitwasyon, kay base pa sa pre-pandemic o panahon nga ubos pa ang mga klase ug biyahe.
Giingon pa niya nga bisan pa sa mga diskwento ug subsidya, dili gihapon makasulbad sa kahimtang sa mga drayber tungod sa ubos nga kita ug kulang sa pasahero karong ting-init.
