Gipahigayon sa Commission on Elections o Comelec kagahapon, Sabado ang final testing ug sealing sa automated counting machines sa Mindanao isip kabahin sa katapusang pagpangandam alang sa makasaysayanong parliamentary elections sa Bangsamoro Autonomous Region in Muslim Mindanao o BARMM.
Personal nga gisaksihan ni Comelec Chairman George Garcia ang pagsulay ug pag-seal sa mga makina sa Cotabato City Institute sa Cotabato City, nga usa sa mga gitudlong polling center.
Gipahigayon ang maong proseso aron masiguro ang hustong pag-andam sa mga makina, ingon man ang luwas, hapsay ug matinud-anong pagdumala sa eleksyon sa Septiyembre 14.
Naka-standby usab ang mga personnel sa kapulisan sa Dalican Pilot Elementary School sa Datu Odin Sinsuat, Maguindanao del Norte samtang gihulat ang pag-abot sa mga gamiton nga makina.
Sumala sa administrasyon sa Dalican Pilot Elementary School, 16 ka classroom ang gamiton isip polling places diin matag lawak butangan og usa ka automated counting machine.
Samtang, gipataas na sa Philippine National Police o PNP sa full alert status ang tibuok rehiyon sa BARMM aron masiguro ang kalinaw ug seguridad atol sa unang parliamentary elections sa rehiyon.
