Gikampaniya ni kanhi US President Barack Obama si Vice President Kamala Harris sa campaign rally sa Pittsburgh sa swing state sa Pennsylvania gabie sa Huwebes, oras sa Amerika.
Sa speech ni kanhi US Pres. Obama sa University of Pittsburgh, miapela siya sa katawhan sa Amerika nga mubotar alang kang Vice President Kamala Harris isip Pangulo sa Amerika sa umaabot nga eleksyon sa Nobyembre 5, 2024.
Gibanatan usab ni Obama ang kaatbang sa US Presidential race ni VP Harris nga si Republican candidate og ex-US President Donald Trump kalabotan sa nagkadaiyang mga isyu lakip na niini ang mga bakak ni Trump batok sa paghatag og ayuda sa Biden administration sa mga biktima sa bagyong Milton og Helene kung asa gihikawan og hinabang ang mga anaa sa Republican areas og ginatigom aron ihatag sa dili dokumentadong immigrants.
Gisaway usab ni Obama si Trump isip usa ka hakog nga pulitiko nga ang bugtong ginauna mao ang iyang ego, salapi og iyang estado.
Wala usab matod pa ginahunahuna ang katawhan sa Amerika og giakusahan usab si Trump nga ginasulayan niining bungkagon ang Affordable Care Act, usa ka mahinongdanon nga legislation kung asa nakadepende ang milyun milyon nga Americans.
Kahinumduman, una ng dayag nga giendorso sa ika-44 nga Presidente sa Amerika kauban ang iyang asawa nga si Michelle Obama si VP Harris sa miaging Hulyo human gianunsiyo ni US President Joe Biden ang iyang pag-atras sa 2024 US Presidential race.
Samtang, dungan sa pagpangampaniya ni Obama kang Harris sa Pennsylvania, sa landlocked state usab sa Nevada nangampaniya si Democratic nominee Kamala Harris aron makakuha og suporta gikan sa mga botanteng Latino.
Samtang si Trump usab nangampaniya sa labing dako nga siyudad sa swing state sa Michigan.
