Andam ang United States nga maglusad pag-usab og mga pag-atake batok sa Iran kon mapakyas ang nagpadayon nga negosasyon, sumala kang US Defense Secretary Pete Hegseth.
Kini mitungha taliwala sa padayon nga paningkamot sa mga negosyador sa Washington ug Tehran aron masulbad ang mga nag-unang kalainan nga nakababag sa pagkab-ot sa usa ka permanente nga kasabutan.
Sa iyang pahayag atol sa Shangri-La Dialogue sa Singapore, miingon si Hegseth nga adunay “mas dako nga kapasidad” ang Amerika sa pagpadayon sa operasyong militar kon kini gikinahanglan.
Matud pa niya, igo ug andam ang ilang mga imbentaryo sa armas nga gibutang sa nagkalain-laing bahin sa kalibotan.
Gipasalig usab sa kalihim nga dili biyaan sa Amerika ang rehiyon sa Asia-Pacific bisan pa sa tensiyon sa Middle East.
Sumala kaniya, kaya sa Estados Unidos nga atubangon ang duha ka hagit sa samang higayon ug gipalig-on nila ang ilang defense industrial base aron madoble, matriple, o mahimong upat ka pilo ang produksiyon sa mga bala sa labing madali nga panahon.
Dugang pa ni Hegseth, bisan pa nga mapailubon si US President Donald Trump, gusto niini nga makab-ot ang usa ka lig-on nga kasabutan nga makasiguro nga dili gayod makabaton og nukleyar nga armas ang Iran.
Sa wala pa kini, nagpulong si Trump ug ang iyang mga top aide sa Situation Room sa White House niadtong Biyernes aron hisgutan ang 60 ka adlaw nga pagpalugway sa ceasefire sa Iran, apan natapos ang maong meeting nga walay klarong kasabutan.
