GENERAL SANTOS CITY -Mismong ang kanhing gi-suplayan og iligal nga droga ang nagsumbong sa pulis kay Monjamire Ortuoste, 21-anyos, nga taga Cotabato City.
Si Ortuoste, naaresto sa buy bust operation nga gipahigayon sa City Drug Enforcement Unit sa Prk Malipayon labangal ning dakbayan. Matud kay PSR Insp. Fernando Manuel, ang labaw sa maong buhatan nga gihikay na ang mga dokumento alang sa pagpasaka og kaso sa paglapas sa RA 9165 kon Comprehen sive dangerous drugs act of 2002 batok sa suspek.
Gibutyag sa opisyal, 50 gramu sa shabu ang narekober gikan sa posisyon sa suspek nga balor P450, 000.00.
Kini human nga napalitan ang nasampit og usa ka sachet sa shabu human nga gitunol sa pulis nga nagpakaaron-ingnon nga poseur buyer ang mark money. Sumala pa ni P/Sr Insp. Manuel, usa ka Civil Engineering student sa Cotabato City ang suspek apan gigamit nga runner sa iligal nga droga ang nasampit sa Cotabato og Maguindanao.
Siya ang ginakuhaan og supply sa droga sa mga pushers dinhi sa dakbayan kon asa dinagko ang transaksyon.
Kahibaluan nga nangarkila ang suspek og van aron ihatud ang droga sa GenSan.
