Gapanawagan ang Embahada sa Pilipinas sa Israel sa tanang mga Pilipino nga nagpuyo sa maong nasud nga
magpabilin sa sulod sa ilang mga panimalay ug sundon ang mga security protocols, human nga gi-ila sa Israel Defense Forces (IDF) ang tibuok nasud sa ilawom sa essential activity status.
Ang maong kahimtang gi-deklara tungod sa padayon nga kagubot tali sa Israel ug Iran.
Ilawom sa status, gikansela ang tanang klase sa mga eskwelahan, gibawal ang tanang matang sapagtigom o mass gathering, ug ang mga empleyado nga nagtrabaho lang sa essential services ang gitugutan nga mopadayon sa trabaho.
Gipahimangnuan usab sa embahada ang mga Pilipino nga mangandam ug kahibalo sa dalan paingon sa mga bomb shelters, safe rooms, o evacuation areas kung adunay missile alert o emerhensiya.
Sumala sa datos sa Department of Foreign Affairs (DFA), 223 ka mga Pilipino sa Israel ang misumite og hangyo alang sa repatriation. G
ikatakdang muuli sa Pilipinas ang 26 kanila sa umaabot nga mga adlaw.
Usa sa mga Pilipino ang gitaho nga naa sa kritikal nga kondisyon, samtang pito na ang nakagawas sa ospital.
Tungod sa kahimtang, gipataas na sa gobyerno sa Pilipinas ang Crisis Alert Level 3 sa Israel ug Iran.
Gi-awhag usab ang tanang Pilipino nga anaa sa duha ka nasud nga mupahimulos sa voluntary repatriation program.
Alang sa tabang ug impormasyon, mahimong kontakon ang Embahada sa Pilipinas sa Israel sa ilang hotline number: +972 54-4666118.
Padayon ang pagbantay sa sitwasyon samtang nag-awhag ang gobyerno sa pag-ampo, kahandam, ug paghiusa sa tanang Pilipino.
