GENERAL SANTOS CITY – Karong adlawa gilaumang kasuhan ang duha ka mga opisyal sa barangay ug anak sa kapitan nga nasikop sa gipahigayong anti-drug operation sa Police Regional Office-12 sa Lambayong, Sultan Kudarat.
Sa pakighinabi sa Bombo Radyo kang Police Superintendent Maximo Sebastian, gibutyag niini ang naasoy’ng raid ang subay sa search warrant batok sa duha ka barangay captain ug kagawad sa managlaing barangay sa nasampit nga lugar, may kalabutan sa pagsupak sa RA 10591 kon Comprehensive Firearms and Ammunition Regulation Act ug RA 9165 kon Comprehensive Dangerous Drugs Act of 2002.
Giila ang mga nasikop nga silang Kapitan Ali Bigkug, 49 anyos, sa Brgy Seneben, ug ang anak niini nga si Mohiden Bigkog, hamtong ang pangidaron, ug si Kag. Mohammad Tasil sa Brgy Pimbalayan.
Samtang, wala naabtan sa mga otoridad ang laing usa ka target nga si Kapitan Butch Magango, 48 anyos, sa Brgy Sadsalan. Narekober sa posisyon ni Kapitan Bigkug ang lima ka sachet sa shabu, samtang sa iyang anak narekober ang usa ka oozy 9mm ug usa ka .45 caliber pistol.
Narekober usab sa posisyon ni Kag. Tasil ang usa ka .45 caliber, samtang sa panimalay ni Kapitan Magango narekober ang ubay-ubay ka mga bala.
Kasamtangang balhug sa Lambayong Municipal Police Station ang tulo ka dinakpan samtang giasikaso sa kapulisan ang kaso nga ilang pagaatubangon.
