GENERAL SANTOS CITY – Epektibo gilayon kaniadtong October 6 ning kasamtangang tuig ang pagrelieve ni PNP chief Gen. Rommel Francisco Marbil sa duha ka opisyal sa PRO12 human ang kontrobersiya nga gipatungan matod pa sa usa ka police colonel ang policewoman recruit sa sulod sa firing range sa headquarters sa Police Regional Office 12 sa Brgy Tambler ning dakbayan sa Heneral Santos.
Sa nakuhang impormasyon sa Bombo Radyo, ang duha ka police officials ang gibalhin didto sa Police Holding and Accounting Unit sa Directorate for Personnel and Records Management sa Camp Crame.
Nagpasabot nga anaa sa “floating status” ang duha ka Police Colonel.
Una niini, gimandoan ni Major Gen. Sydney Hernia labaw sa PNP Directorate for Intelligence si OIC PRO12 Director Brig. Gen. James Gulmatico nga mag-sumite og report sa kaso pinaagi sa Regional Intelligence Office kon R2.
Kini kalabutan sa kontrobersiya kung asa ang biktima usa matud pa ka Police recruit nga giingong gihilabtan sa usa ka Opisyal ug pagkahuman gidestino sa layo nga dapit ug wala matud pa gitugtan nga makagawas sa kampo aron matud pa dili makareklamo.
Napakyas matud pa nga mag imbestiga ang Intelligence Office hinungdan nga apil gi relieve sa Chief PNP.
Kahinumduman nga giadtuan sa Bombo News team si Police Major Rissa Hernaez tigpamaba sa PRO12 apan gipanghimakak sa opisyal ang mikatag nga balita nga giingon niini nga alegasyon lamang.
