GENERAL SANTOS CITY – Gihatagan ug laing pangalan sa Department of Health ang programa nga Resbakuna ngadto na sa PinasLakas gamit ang mga bag-ong estratihiya aron managhan ang maturukan ug booster shot.
Matud ni Dr. Carl Igrubay sa City Health Office nga target sa Department of Health nga naatul sa paglingkod sa bag-ong administrasyon ni President Ferdinand Marcos Jr. nga makuha ang singkwenta porsyento sa mga naturukan ug second dose ang mahatagan ug booster shot una ang Oktobre 8, 2022 lakip maturukan ang nubenta porsyento sa mga senior citizen sa sama nga petsa.
Base sa data kaniadtong Agosto Dyes aduna nay naturok nga 890,757 ka doses kini gilangkuban sa 406,113 indibidwal nga fully vaccinated bugti sa 75.63 percent.
Samtang target sa ahensiya nga makaturok ug booster shot nga singwenta porsyento sa target population bugti sa 180,000 sulod sa unang 100 days apan sa kasamtangan mukabat pa lamang sa 74,406 indibidwal ang nahatagan ug booster bugti sa 41.80 percent sa target.
Giangkon ni Dr. Igrubay nga naglisod sila sa pag-awhag sa mga senior citizens nga maturukan ug booster luyo nga mukapin setenta porsyento na sa ilang populasyon ang naturukan apan kulang gihapon kini ug onse kapin ka porsyento aron makab-ot ang nubenta porsyento nga target.
Kahinumduman nga gipasidunggan sa mga Konsehal ang lima ka barangay nga mao ang Lagao, San Isidro, Fatima, Calumpang, ug Labangal atul sa ceremonial turnover.
