GENSAN- Mikomento si Atty. Rey Cartojano sa desisyon ni kanhi Pangulong Rodrigo Duterte nga dili na motambong sa mga proceedings sa International Criminal Court nga naglakip sa mga reklamong iyang giatubang.
Sumala sa abogado, ang desisyon ni Duterte usa ka legal nga estratehiya ug naa sa iyang katungod isip akusado sa bisan unsang political trial.
Gidugang ni Atty. Cartojano nga ang dili pag-apil sa pagdungog mahimong ma-justify, ilabina tungod kay ang kampo ni Duterte nagkwestyon sa hurisdiksyon sa ICC ug sa kondisyon usab sa kanhi presidente, nga posible nga limitado ang iyang kapasidad sa pag-apil sa taas nga pagdungog.
Gipasabot niya nga adunay daghang kalainan ang proseso sa ICC kumpara sa korte sa Pilipinas.
Pananglitan, anaa sa ICC ang gitawag nga confirmation of charges ug ang pag-ila sa mga co-perpetrators, nga wala sa atong nasudnong hurisdiksyon.
Bisan pa man, ang ICC nagpabilin sa pagpadayon sa ilang proseso subay sa ilang mga patakaran.
Dugang pa ni Cartojano, bisan dili miyembro ang Pilipinas sa ICC, ang kampo ni Duterte padayon nga makabuhat sa mga lakang nga legal ug magdepensa batok sa kaso.
Matod niya, kini nga lakang usa ka pamaagi aron protektahan ang legal nga interes sa kanhi presidente samtang nagpadayon ang debate sa hurisdiksyon ug legal nga proseso tali sa Pilipinas ug sa ICC.
