Mas gipakusgan sa Department of Education o DepEd General Santos City ang kampanya batok sa bullying, pagpanakit ug pagpanghadlok sa mga estudyante sulod ug gawas sa mga tulunghaan, lakip na ang mga insidente nga mahitabo online.
Kabahin kini sa pagpatuman sa DepEd Order No. 006, series of 2026 o ang Guidelines on Ensuring a Safe and Motivating Learning Environment, diin gipasiugda ang zero-tolerance policy batok sa bullying ug uban pang porma sa kapintasan sa mga estudyante.
Sa lokal nga lebel, gikinahanglan ang koordinasyon sa mga eskwelahan sa DepEd Gensan uban sa Philippine National Police o PNP, Department of Social Welfare and Development o DSWD, ug mga local government unit aron masiguro ang hustong pag-atubang sa mga insidente.
Ang Child Protection Committee sa matag eskwelahan maoy gisaligan sa pagdumala ug pag-imbestiga sa mga sumbong, lakip ang paghatag og hustong proteksyon ug psychosocial support sa mga biktima.
