Dengue cases sa GenSan, misaka na sa 1, 220; pito ang patay
GENERAL SANTOS CITY – Misaka na ngadto sa 1, 220 ka kaso sa dengue ang natala dinhi sa dakbayan sa Heneral Santos ning tuiga.
Base kini sa report sa City Epidemiology Surveillance Unit sa City Health Office, gikan Enero 1 hangtod Hunyo 3 ning tuiga.
Gikabutyag nga 219 percent kining mas taas itandi sa natala nga ihap sa susamang period miaging tuig nga mukabat lamang sa 382 cases.
Samtang, nagpabiling anaa sa pito ang namatay tungod sa naasoy’ng sakit dinhi sa siyudad.
Nanguna sa mga barangay nga may labing daghang natala nga kaso sa dengue mao ang Calumpang nga may 166, nga gisundan sa Lagao nga may 159, ug sulod usab sa top 5 ang San Isidro-123, Fatima-117, ug Labangal-104.
Kalabot niini, kahibaluan nga nagpasa ug ordinansa si Kag. Edmar Yumang alang sa pagpahigayon on monthly clean-up drive sa 26 ka mga barangay sa siyudad.
Ug gani, nakapasa na kini sa third and final reading sa Sangguniang Panglungsod.
Matud pa nga ang tumong niini nga makunhuran kon dili hingpit makontrola ang kaso sa dengue sa siyudad.
Kahibaluan nga ang pagpanglimpyo sa palibot ang maoy nag-unang yawi lamang aron makalikay sa makamatay nga dengue.
