Kapin sa 100 ka pamilya sa Kiamba Sarangani Province ang apektado sa grabeng pagbaha tungod sa ulan.
Matod ni Mayor George Falgui sa Kiamba, 53 ka pamilya sa Brgy. Tablao apektado, 20 sa Brgy Luma, 20 sa Brgy. Nalus samtang sa Brgy. Lomuyon ug Brgy. Lebe nagpadayon ang pagsuta kon pila ka pamilya ang apektado.
Sa Brgy. Lomuyon, usa ka balay nga anaa kilid sa sapa ang gianod sa kusog nga bul-og sa tubig-baha.
Adunay brownout nga nasinatian sa mga panimalay sa Brgy. Kapate human natumba ang poste sa kuryente.
Matod sa mayor nga ang national highway sa Brgy. Nalus ang grabeng gibaha kagahapon.
Sa pagkakaron nagpadayon ang damage assessment ug pag-apud-apod sa family food packs sa Municipal Disaster Risk Reduction and Management Council-Kiamba uban sa mga personahe sa DSWD-Region 12.
Gipadala na ang mga ekipo sa mga apektadong lugar. Sa pamahayag ni Mayor Falgui, nagpadayon ang damage assessment sa pagbaha.
