GENERAL SANTOS CITY – Walay mamahimong problemahon ang pamilya human nga giabaga tanan sa contractor ang tanang gastos sa laborer nga namatay human nga kini nahulog sa ginatrabaho sa unom ka andana nga gambalay dinhi sa dakbayan.
Giila ang biktima nga si Nidi De Vera, 18 anyos nga taga Jhonny-Ang Paradise Brgy. Dadiangas Heigths ning syudad.
Matud pa ni Mary Grace De Vera nga mapasalamaton ang ilang pamilya tungod gitabangan sila sa tanang balaydunon sa hospital apil ang galastuhon sa haya og pagpalubong sa iyang igsuon.
Giangkon niini nga nakalitan pa gihapon sila sa nadangatan sa iyang igsuon hilabi na nga walay gihimong dautan dihang buhi pa.
Sa pagsaysay sa foreman nga si Jonax Bolo samtang nagkuha sila og mga materyales, misaka ang biktima sa atop nga bahin.
Nahibulong sila nganong mamintura ang biktima kini tungod mamalit pa lamang ug pintura .
Ilang gipasagdan ang biktima hangtud nga nakadungog na lang silang tanan og makusog nga paglagapok og didto ilang nakit-an nga nahulog ang biktima.
Gibutyag nga walay sul-ob nga harness o safety belt ang biktima. Nasuta nga tulo ka adlaw kini nga mitinir sa ospital una nakabsan sa kinabuhi.
