GENSAN – Nagpasidaan ang opisina sa Commission on Elections (COMELEC) sa Gensan pinaagi ni Atty. April Melchor Miguel nga dili na angay hulaton ang deadline sa pagpa-rehistro sa mga botante.
Matud niini nga dugay ra nga nagsugod ang voter’s registration ug padayon kini hangtod matapos karong umaabot nga Mayo 26, 2026.
Gihatagan usab niya og kahimungdan ang kaimportante sa pagpa-rehistro aron masiguro nga makaboto ang mga botante sa umaabot nga Barangay ug Sangguniang Kabataan Elections (BSKE) sa Nobyembre 2026.
Gipasabot ni Atty. Miguel nga ang sayo nga pagpa-rehistro dili lang makatabang sa mga botante nga makaapil sa eleksyon, apan makalikay usab sa rush ug kakapoy sa katapusan nga mga adlaw sa registration period.
Ang COMELEC Gensan nag-awhag sa tanan eligible voters nga magpa-rehistro sa labing sayo aron masiguro ang ilang katungod sa pagboto ug aron mas hapsay ang proseso sa eleksyon.
