GENERAL SANTOS CITY – Subling nanawagan si Geraldine Zamora, labaw sa City Permits and Licensing Division ning dakbayan, ngadto sa mga negosyante nga dili na paabuton pa nga ilang pasirad-an ang ilang mga establisyimento, una magdali-dali sa paghikutar ug pagkuha ug business permit.
Alayon kini sa nagpadayon nilang pag-inspeksyon ug pagpang-padlock sa mga establisyimento sa siyudad nga walay business permit.
Kahibaluan nga sa unang adlaw sa pagpang-padlock, lima gilayon ang napasirad-an ug nakabalik lamang sa operasyon human makakuha ug business permit pagka-hapon.
Samtang kagahapong adlawa, tulo usab ka mga establisyimento ang nasampolan.
Una nang gihingusgan ni Zamora nga bisan ug supak sa ilang kabubut-on apan kinahanglan gayud nilang himuon ang ilang trabaho.
Hinungdan nga gibutyag sa naasoy’ng opisyal nga kon mahimo man diay nga makumpleto ang mga rekositos ug makakuha ug business permit sulod sa usa ka adlaw, himuon kini alang sa labing daling panahon ug dili na hulaton nga ilaha pang mapasirad-an ang mga establisyimento.
