GENERAL SANTOS CITY – Nagpasalamat si Dr Rochelle Oco ang labaw sa City Health Office sa suporta sa mga ginikanan aron mabakunahan ang ilang mga anak kontra sa tipdas.
Kini human nagpahigayon ug immunization alang sa mga kabataan sa mga tulunghaan.
Gipaklaro ni Dr. Oco nga gawas sa mga health centers sa mga barangay ila nang giapil sa programa ang mga tulunghaan.
Gikadugang pa ni Oco, dili alarming o mas ubos sa alert threshold ang mga kaso sa tipdas dinhi sa dakbayan samtang wala kini nakadawat ug bag-ong report nga adunay namatay nga pasyente human misaka sa ulo ang infection.
Usa sa ilang nakita nga agresibo ang kampanya sa City Health Office nga gisugdan kaniadtong 2018 kung asa aduna pay ‘house to house’ nga vaccination.
Panawagan ni Dr. Oco sa mga ginikanan nga mutagana gayud ug panahon alang sa mga programa sa maayong panglawas aron malikayan ang pagkamatay gumikan sa tipdas.
