GENERAL SANTOS CITY- Nabalaka si GenSan City Councilor Lourdes Casabuena nga mapasa ang sugyot balaodnon kalabut sa pagbalik sa death penalty.
Matud pa ni Kag. Casabuena nga kini gumikan daghan ang gasuporta sa kongreso ilabi pa nga adunay pagtugot gikan kang Pangulong Rodrigo Duterte.
Gikadugang pa sa nasampit nga opisyal nga unta dili basolan sa umaabot nga mga adlaw kon ugaling madayon makasulot ang maong sugyot balaudnon.
Gihingusgan niini nga ang Diyos lamang ang may katungod nga magkuha sa kinabuhi sa usa ka tawo.
Samtang kung adunay nahimong sayop, angayang hatagan og kahigayonan nga magbag-o.
Samtang gatuo si Kag. Casabuena nga dili maundang ang ilegal nga droga bisag ipatuman pa ang death penalty.
Gituohan usab niini nga alang lamang sa kabus ang death penalty nga walay kaya nga magbayad og maayong abogado aron depensahan ang kaso.
Kahibaluan nga nahimong hisgutanan sa Kongreso ang maong isyu bisag sa hugot nga pagbabag sa daghang mga grupo.
