GENSAN – Padayon ang pagbantay ug monitoring sa City Health Office (CHO-GenSan) batok sa posible nga pagsulod sa Mpox virus sa siyudad.
Sa pamahayag ni Dr. Karl Igrobay, Assistant City Health Officer, nagpabilin sa heightened alert status ang ilang buhatan aron mapugngan ang pagkaylap sa maong sakit.
Gibutyag ni Dr. Igrobay nga padayon ang ilang information dissemination sa komunidad isip preventive measure batok sa virus.
Gipasabot usab niya nga gitutukan karon sa CHO ang pagpadayon sa training sa ilang mga health personnel aron masiguro nga andam ang siyudad kung adunay posibleng kaso nga mosulod.
Dugang pa sa opisyal nga adunay mga nurse ug doctor nga gibansay gikan sa mga pampubliko ug pribadong ospital sa siyudad, aron mas lig-on ang local health response.
Gipasalig niini nga andam ang City Health Office nga motubag sa emerhensiya kung ugaling musulod ang Mpox virus sa syudad, ug gipaniguro nilang aktibo ang ilang koordinasyon sa DOH ug ubang ahensya.
