GENERAL SANTOS CITY – Nahunosan na sa kinabuhi ang usa ka inahan nga tulo ka bulang buntis human nga nadisgrasya ang gisakyang motorsiklo sa Diversion road Brgy. Mabuhay ning dakbayan.
Kagahapon, alas 10 sa buntag dihang namatay sa ospital ang biktima nga si Daisy Delos Santos Wata, 30 anyos nga residente sa Sitio Tuning, Part 12 Brgy. Lagao ning syudad. Sa imbestigasyon, nagsakay ang biktima sa motorsiklo nga maneho sa iyang kalive-in partner nga si John Mark Dandoy Bulingit, 20 anyos nga taga Aquino Sr, Prk. Kaunlaran Brgy. City Heights.
Kusog matud pa ang padagan sa lalaki hinungdan nga pag-abot sa balason nga bahin sa Prk Luwalhati sa Diversion Road, Mabuhay nawad-an og kontrol sa pagmaneho og natumba ang motorsiklo.
Nagresulta kini nga nahulog ang buntis og nakaangkon ug serious hed injury samtang ang kapuyo ang nakaangkon og mga garas sa kamot og tuhod.
Pagkakaron, naa sa kustodiya pa sa Traffic Management Unit ang driver sa motorsiklo.
