GENSAN – Hilabihan ang kalipay ug pagpasalamat sa mga lumulupyo ug lider sa komunidad atol sa malampusong pagsaulog sa Ika-11 nga Blaan Day nga gipahigayon kagahapong adlawa.
Ang maong selebrasyon usa ka timaan sa pagpasidungog sa kultura, tradisyon ug kontribusyon sa katawhang Blaan sa katilingban. Nagpakita kini sa ilang kaisog, panaghiusa, ug pagka mapasalamaton sa ilang pagkatawo ug kagikan.
Matud ni Saldi Ne, usa sa mga respetadong lider sa tribo, nga dako ang iyang kalipay nga nagpadayon ang Blaan Day isip plataporma sa paghiusa sa tanang Blaan ug sa pagpadayag sa ilang kultura sa mas lapad nga katilingban.
Gipasiugdahan sa lokal nga pangagamhanan sa Heneral Santos ang selebrasyon nga giapilan sa mga tribal elders, kabatan-onan, ug mga bisita nga mitambong sa nagkalain-laing aktibidad sama sa tradisyonal nga sayaw, pasundayag sa sinina, ug mga produktong lokal nga Blaan.
Ang Blaan Day dili lang pagpahalipay, kondili usa sab ka paalaala sa tanang lumad ug dili lumad nga ang panaghiusa ug respeto sa kultura importante alang sa kalamboan ug kalinaw sa komunidad.
Padayon ang panawagan sa mga lider nga ipadayon ang pagpangga sa kultura sa tribo ug palig-onon ang edukasyon, kahimtang sa panginabuhian ug partisipasyon sa katilingban.
