Gibutyag sa Department of Justice (DOJ) nga posible nga mosaka sa kapin usa ka gatos ang ihap sa mga nawala nga sabungero sa nasud, mas dako pa kaysa orihinal nga report nga 34 ka tawo.
Matod ni Justice Secretary Jesus Crispin Remulla, kini ang impormasyon gikan sa usa ka testigo nga gitawag sa alyas nga “Totoy”, nga giingong nalambigit sa kaso.
Sumala sa iyang pamahayag, daghan pa kaayong insidente sa pagpangdagit ug pagpamatay nga wala pa mabutyag sa publiko.
Dugang pa niya, adunay kapin sa napulo ka personalidad nga giingong nalambigit sa mga krimen, kadaghanan kanila may kalambigitan sa illegal online sabong ug mga sindikato nga konektado sa sugal ug krimen.
Human sa mga pamahayag ni Alyas Totoy, gisugdan na sa DOJ ang pagproseso sa mga impormasyon ug posible nga musang-at og dugang pang mga kaso.
Bisan wala pa matino ang tanang detalye, gisiguro ni Remulla sa mga pamilya sa mga biktima nga padayon ang paglihok sa gobyerno aron makab-ot ang tinuod ug hustisya.
Kahinumduman nga upat na ka tuig ang milabay sukad gisugdan ang imbestigasyon kabahin sa mga nawala nga sabungero.
Niining miaging semana, mipatim-aw si Alyas Totoy ug mitug-an nga patay ug gilubong na matod pa ang 34 nga missing nga sabungero ug giingong mas daghan pa ang wala pa mabutyag.
