GENSAN – Nagpahimangno ang Bureau of Fire Protection sa General Santos sa publiko nga magmatngon sa paggamit og pabuto karong Pasko og pagsaulog sa Bag-ong Tuig aron malikayan ang sunog ug kadaut sa lawas.
Matod ni Senior Fire Officer 2 Filamer Acub, Chief Personnel sa Bureau of Fire Protection (BFP) sa Gensan nga angayang likayan ang paggamit ug pagpamaligya sa mga ginadili nga matang sa pabuto og pyrotechnic devices, labi na ang dagkong pabuto nga walay permit ug delikado gamiton.
Kasagaran sa insidente matag Disyembre may kalabotan sa sunog ug firecracker injury tungod sa sayop nga paggamit sa pabuto, kakulang sa safety measures, ug paghatag niini sa mga bata.
Busa gi-awhag ang mga ginikanan nga bantayan ang ilang mga anak ug siguruhon nga adunay safety awareness ang matag panimalay kontra sa pabuto.
Gidugang ni Acub nga magpadayon sila sa regular nga inspeksyon sa mga tindahan sa pabuto aron masiguro nga naa sa saktong lugar ug kompleto ang permit sa nagabaligya.
Giingon usab nga importante nga i-report dayon sa otoridad ang bisan unsang ilegal nga firecrackers aron mapanalipdan ang seguridad sa komunidad.
