Gikumpirma ni Interior Secretary Jonvic Remulla nga usa ka subpoena ang ipagawas alang kang Senador Ronald “Bato” dela Rosa ugma, Mayo 11.
Sa usa ka press conference, giklaro ni Remulla nga dili kini usa ka arrest warrant apan kabahin lang sa imbestigasyon bahin sa daghang mga reklamo batok kang dela Rosa tungod sa giingong extrajudicial killings sa gubat batok sa droga atol sa administrasyong Duterte.
Gidugang sa kalihim nga wala pa siyay nakitang kopya sa International Criminal Court (ICC) arrest warrant batok sa kanhi senador.
Giklaro na sa ICC kaniadto nga wala pa silay gipagawas nga public arrest warrant alang kang dela Rosa.
May kalabotan niini, gipahibalo ni Remulla nga ang Department of Interior and Local Government (DILG) dili mopadayon sa pagpadala og 10,000 ka tawo nga task force aron pangitaon ang senador. Bisan pa, giingon niya nga ang Philippine National Police-Criminal Investigation and Detection Group (PNP-CIDG) magpadayon sa pagpangita kang dela Rosa alang sa usa ka subpoena.
Kahinumduman nga si dela Rosa wala na mibalik sa Senado ug wala na nagpakita sa publiko hangtod sa Nobyembre sa miaging tuig human sa mga taho nga ang ICC nag-isyu og warrant of arrest batok kaniya tungod sa iyang giingong kalambigitan sa gubat war against drugs ni kanhi Presidente Rodrigo Duterte.
Aduna usab usa ka pending nga reklamo batok sa senador sa Senate Committee on Ethics tungod sa iyang dugay nga pagkawala sa mga sesyon sa Senado apan nakadawat gihapon sa iyang sweldo.
