GENERAL SANTOS CITY – Gikumpirma Lt. Daryl Cansancio, tigpamaba sa 73rd IB Philippine Army, nga usa ka wala pa mailhing miyembro sa New Peoples Army kon NPA ang napatay sa natigayong engkwentro tali sa mga rebelde ug tropa sa gobyerno, Brgy Little Baguio, Malita, Davao Occidental.
Kini human sa hot pursuit operation nga gipahigayon sa kasundaluhan, gumikan matud pa sa mga report nga padayon ang kalihukan didto sa mga rebelde partikular na sa Guerrila Front 71 ilawom kang Alyas Dong, sama sa extortion ug pagpang-harass.
Ug gani, gikabutyag may mga gagmay’ng tindahan ang gipanglungkab sa mga rebelde. Gikabutyag nga Huwebes dihang natigayon ang 20 minutos ang engkwentro, kung asa napatay ang nasampit nga rebelde. Samtang sa bahin sa mga sundalo, walay gikabutyag nga nasamdan o namatay.
Matud ni Lt. Cansancio, batan-on pa ang nasampit nga miyembro sa NPA, anaa sa 19 ngadto sa 22 anyos, niwangon ug puti-on, apan walay bisan unsang ilhanan.
Narekober usab duol sa patay’ng lawas niini ang usa ka M16 rifle.
Kasamtangang nagpabilin sa usa ka punerarya sa Malita ang patay’ng lawas niini, ug sa karon wala matud pay claimant.
Hinungdan nga gapanawagan ang nasampit nga opisyal ngadto sa kinsa man nga nawad-an ug kabanay, o may kabanay nga miapil sa mga NPA, nga mahidangat sa nasampit nga punerarya, alang sa pagkuha sa patay’ng lawas niini.
