Nagpadayon karun ang imbestigasyon nga gipahigayon sa Lagao Police Station kalabutan sa nakaplagang wala nay kinabuhi nga bag-ong himugso nga bata, kagahapong adlawa alas 3 pasado sa hapon sa Molave Street, Rosario Village, Barangay Lagao, dakbayan.
Sumala pa nga usa ka lalaki nga giilang si Ryan Anecite, 28 anyos, nga residente sa Narra Street, Pag-asa, Barangay Lagao ang nipahibalo sa Police Station 3 nga adunay gilabay nga fetus sa maong lugar nga dali usab kining girespondihan sa kapulisan.
Nasayran nga ang fetus ang gibana-banaang anaa sa unom ngadto sa walo ka bulan, kini usab ang nabulag na sa gisudlan niini nga usa ka adult diaper.
Ang patayng lawas sa bag-ong himugso nga batang lalaki ang gihipos ug gidala sa mga personahe sa Lagao BSWDO sa punerarya ning syudad alang sa desenteng pagpalubong.
Ang kapulisan nag-awhag sa publiko nga motabang sa paghatag og impormasyon aron matumbok ang suspetsado.
