Kanunay magsul-ob og wedding gown si Tess Tregellas kon moapil sa mga marathon. Tungod matud niya nga basig pag-abot niya sa finish line, naa didto si ‘The One’ nga mahimong iyang umaabot nga bana.
Si Tess Tregellas taga Brooklyn, New York City, usa sa mga partisipante sa Brooklyn Half Marathon nga gipahigayon kaniadtong Mayo 17, 2025.
Kon itandi sa ubang marathon runners nga kompleto sa gamit sa running gears, si Tess nagsul-ob og wedding gown.
Sa usa ka video nga iyang gi-post niadtong Mayo 19, sa wala pa magsugod ang marathon, ang 28-anyos nga babaye nikomedya nga mahimo na niyang mahimamat ang lalaki nga iyang ingnan ug “I do”.
Pagkahuman sa marathon, giingon ni Tess sa usa ka pakighinabi sa New York Post nga wala siya nakakita nga posible nga iyahang minyuan .
Nagtuo siya nga nahadlok ang mga lalaki sa iyang gimik.
Ang mga babaye nga nitan-aw sa marathon gikataho nga ganahan sa iyang performance sa pagsul-ob og wedding gown.
Sa luyo sa iyang wedding gown nasulat ang “just hopeful.”
Si Tess mirekord og oras nga 2:33:44 aron makompleto ang marathon. Matod niya, gihimo lang niya ang pagdagan aron maka-good vibes.
Dili kini ang unang higayon nga niapil si Tess sa Brooklyn Half Marathon nga nagsul-ob og wedding gown.
Sa miaging tuig, niapil usab siya ug nag-post og mga litrato sa social media. Siya adunay 203,000 ka mga followers sa usa ka social mediua site
