Gilimod ni dismissed Bamban Mayor Alice Guo nga adunay mitabang kaniya nga usa ka opisyal sa gobyerno sa Pilipinas aron maka-eskapo kini sa nasud.
Gipanghimakak kini sa nahisgutan human nga gikwestyun ni Senadora Risa Hontiveros ug Senator Jinggoy Estrada atol sa pagdungog sa Senate Committee on Women and Children kung si kinsa ang mitabang kaniya aron nga makahawa kini sa nasud.
Sumala pa ni Guo nga usa ka yate ang ilahang gisakyan kauban sila Shiela ug Wesley Guo aron makasibat sa Pilipinas.
Gikan sa usa ka pantalan sa Maynila, misakay sila matud pa ug usa ka yate ug milabay ang pipila ka mga oras sa ilang pagbyahe, nibalhin kini sa dako nga barko.
Milungtad matod pa sila ug byahe sulod sa dako nga barko ug tulo hangtod lima ka adlaw, kung diin nagpundo lamang sumala pa sa usa ka kwarto.
Wala usab gibutyag ngadto sa publiko ni Guo kung si kinsa ang nanag-iya sa yate, apan iya lamang kining gisulat sa usa ka papel gumikan na usab sa hangyo sa mga senador nga ipasulat na lamang ang pangalan sa responsable sa iyahang pag-gawas sa nasud.
Migawas usab nga usa ka Chinese National ang nag-facilitate aron maka-eskapo si Guo sa Pilipinas niadtong bulan sa Hulyo.
Magpabilin gihapon nga iditene si Guo sa Philippine National Police Custodial Center, samtang ginahangyo pa sa komite ang Korte ug Ombudsman nga kinahanglang sa kostudiya sa Senado kini ipabilin ang nasampit nga suspendidong mayor.
