GENSAN- Nagpadayon ang imbestigasyon sa Bureau of Fire Protection o BFP General Santos City kalabot sa sunog nga miigo sa usa ka boarding house sa Queenes Village, Barangay City Heights, General Santos City, alas 6:00 sa buntag niadtong Nobyembre 17, 2026.
Matod ni SFO1 Lester John Muñez, Arson Investigator sa BFP Gensan, wala pa silay pinal nga konklusyon sa hinungdan sa sunog tungod kay gisusi pa sa ilang imbestigador ang ubang posibleng gigikanan sa kalayo, lakip na ang posibilidad nga cellphone charger ang hinungdan.
Gipasidan-an ni Muñez ang publiko nga likayan ang pag-charge sa cellphone sulod sa tibuok gabii ug tangtangon kini sa saksakan kon moabot na sa 80 porsyento ang lebel sa baterya.
Gidugang usab niya nga dili angay pasagdan nga nakasaksak kanunay ang charger bisan walay cellphone nga gikarga niini, tungod kay mahimo gihapon kining mopagawas og kuryente ug posibleng mo-overheat.
Gipasabot usab sa opisyal nga mas peligroso kon ibutang ang charger duol o ibabaw sa mga dali rang masunog nga butang sama sa kutson ug higdaanan, nga posibleng mahimong hinungdan sa sunog.










