Midesisyon nga moatras si kanhi Miss Universe Philippines 2023 Michelle Dee sa iyang unta nga pag-apil sa Miss Grand International All Stars human makaagi og operasyon sa appendix o appendectomy.
Sa opisyal nga pahayag nga iyang gipagawas online, gikumpirma ni Dee ang iyang pag-atras aron hatagan og panahon ang iyang kaugalingon nga makaayo gikan sa operasyon.
Nahitabo kini human gikatahong gidala siya sa ospital niadtong Nobyembre 9 tungod sa grabeng kasakit sa tiyan, diin gipaagi dayon siya sa emergency appendectomy.
Gipahimangnoan usab si Dee sa iyang medical team nga sundon ang gitakdang panahon sa iyang pagpaayo ug likayan una ang dugay nga pisikal nga kalihokan ug bug-at nga ehersisyo aron malikayan ang posibleng komplikasyon.
Gidawat usab sa beauty queen ang panginahanglan nga hatagan og igong panahon ang iyang lawas aron hingpit nga maulian.
“Kilala niyo naman ako. Dapat buo, hindi kalahati ang mga laban sa buhay,” pahayag ni Dee.
Samtang, nagpadala usab og mensahe sa pagdasig kang Dee ang iyang mga kaubang beauty queen, lakip na si Miss Universe 2023 Sheynnis Palacios nga miingon, “My Michelle! I hope you are well, take care of yourself.”
Lakip usab sa nagpaabot og mensahe ang reigning Miss Grand International All Stars queen nga si Vanessa Pulgarin sa Colombia, nga unta iyang kaatbang sa maong kompetisyon.
Miingon kini, “I hope you’re well.”
Ang unta nga pag-apil ni Dee sa maong kompetisyon maoy dugay nang gipaabot nga pagbalik niya sa beauty pageant scene, diin makig-indigay unta siya kauban sa iyang mga parehong Pinay beauty queen nga sila Alexie Brooks ug Anne Patricia Lorenzo Diaz.











