Giluwas sa batikang forward nga si Jaden McDaniels ang Minnesota Timberwolves gikan sa hapit na nilang kapildihan batok sa Portland Trail Blazers.
Nahimong hugot ang panagsangka sa duha ka koponan diin sa unang quarter, gipangulohan sa Wolves ang Blazers og 12 points, 29-17.
Apan mibawi dayon ang Portland sa ikaduhang quarter human nakapuntos og 31 batok sa 20 points lamang sa Wolves, hinungdan nga nahimong 49-48 ang score, pabor gihapon sa Minnesota.
Sa pagtapos sa ikatulong quarter, natabla na sa Portland ang dula sa iskor nga 79-79.
Nagpadayon ang dikit nga panagsangka sa duha ka koponan hangtod sa nahibiling 10 seconds sa dula, diin nag-una ang Portland og usa ka puntos, 105-104.
Apan gipugos ni McDaniels nga masulod ang usa ka layup, 2.5 segundos sa wala pa matapos ang dula, aron maangkon sa Minnesota ang 106-105 nga bentahe.
Wala na makabawi ang Blazers sa nahibiling hapit tulo ka segundos ug napildi sa usa lamang ka puntos, 106-105. Kini ang ilang ikalimang kapildihan karong season.
Sa kinatibuk-an, nakatampo si McDaniels og 22 puntos, lima ka rebounds ug upat ka assists. Nakarekord usab siya og tulo ka steals ug usa ka block.
Nanguna sa puntos si Wolves guard Ayo Dosunmu nga nakaposte og 30 puntos ug nakasulod og pito ka three-pointers gikan sa 11 niyang tira.
Sa kapildihan sa Blazers, wala nausab ang 25 puntos nga natampo sa batikang guard nga si Damian Lillard, lakip ang 23 puntos gikan sa ilang reserve player nga si Jrue Holiday.
Sa pagkakaron, adunay 11-4 nga win-loss record ang Minnesota Timberwolves.











