Gidakop sa Federal Bureau of Investigation kon FBI ang amahan ni Meghan Markle nga si Thomas Markle, may kalabotan sa kasong pagpanag-iya og mga materyales nga naghulagway sa seksuwal nga pag-abuso sa mga menor de edad.
Sumala kang FBI Director Kash Patel, gikustodiya sa mga agent sa FBI ang 82-anyos nga si Markle sa usa ka nursing home sa Florida.
Gipasanginlan si Markle nga nagtipig og mga ilegal nga materyales nga naglangkob sa mga hulagway sa mga hubo nga menor de edad ug ubang mga babaye sulod sa iyang giabangan nga storage unit sa California.
Nag-atubang siya sa usa ka kaso nga ‘possession of child pornography’ sa US District Court sa Los Angeles.
Sumala sa US Justice Department, kon mapamatud-an ang kaso batok kaniya, mahimo siyang mapriso og hangtod 20 ka tuig.
Si Markle, nga residente sa Lakeland, Florida, unang mitambong sa korte atubangan sa usa ka US magistrate judge duol sa Tampa.
Gimandoan siya sa huwes nga temporaryong makagawas samtang naghulat sa sunod nga pagdungog sa kaso, apan ubos sa home detention ug electronic monitoring.
Wala pa siya mosulod og plea o pormal nga tubag sa mga sumbong batok kaniya, samtang gipaabot nga sugdan ang arraignment sa mosunod nga mga semana.
Base sa affidavit nga gisumite sa FBI isip kabahin sa criminal complaint, gitago kuno ni Markle ang mga sexually explicit materials sa duha ka storage unit nga iyang giabangan sa Los Angeles sukad pa niadtong 2008.
Sa miaging semana, gisulod ug gipangita sa mga ahente sa FBI ang maong mga pasilidad diin nakumpiska ang 78 ka materyales, lakip ang 35mm film negatives ug mga libro nga adunay mga hulagway sa seksuwal nga pag-abuso.
Gisugdan na usab sa mga otoridad sa nasud diin mipuyo si Markle sulod sa pipila ka bulan ang kaugalingong imbestigasyon bahin sa maong alegasyon.
Apan, hugot nga gilimod sa 82-anyos nga film director ang mga pasangil batok kaniya.
Samtang, nagpahayag usab og dakong kasubo si Meghan Markle, aktres ug asawa ni Prince Harry, human nasayran ang mga alegasyon batok sa iyang amahan.
