Gidayeg sa People’s Budget Coalition (PBC) si House Speaker Faustino “Bojie” Dy III tungod sa saad niini nga palig-onon ang transparency sa proseso sa paghimo ug paghisgot sa nasudnong badyet.
Kini human makigpulong ang grupo kang Dy aron hisgutan ang mga lakang nga mahimong buhaton sa Kamara aron mas mapalambo ang pagsusi ug pagpagawas sa mga dokumento kalabot sa mga proyekto sa gobyerno.
Matod sa PBC, lakip sa ilang gihisgotan ang pag-abli sa publiko sa mga supporting documents ug mga deliberasyon aron masuta sa mga magbubuhis kung asa gigahin ang ilang mga buhis.
Gikonsiderar usab sa grupo nga importante nga makigdayalogo ang liderato sa Kamara sa mga civil society organizations ug independent budget monitors nga nagpahayag og kabalaka sa dokumentasyon, technical descriptions ug mga amyenda sa gisugyot nga 6.793 trilyong pisong nasudnong badyet alang sa 2027.
Una nang gipahayag ni Dy nga bukas ang Kamara sa pagpagawas sa mga dokumentong nagsuporta sa mga proyekto, lakip ang mga pagtuon, technical specifications, lokasyon ug validation gikan sa mga implementing agency.
Matod sa PBC, makatabang kini aron masuta kung hain sa mga gisugyot nga amyenda sa badyet ang adunay igong basihan ug kung hain ang nagkinahanglan pa og mas lawom nga pagsusi.
