Wala gilauman nga mosaka ang presyo sa Liquefied Petroleum Gas o LPG sa umaabot nga Disyembre ug posible pa gani kining moubos tungod sa igong suplay niini sa Pilipinas ug sa Asian market.
Kini ang gipadayag ni Arnel Ty, presidente sa LPG Marketers Association, atol sa interbyu sa Bombo Radyo Cauayan.
Matod ni Ty, gilauman nga magpabilin sa kasamtangang lebel ang presyo sa LPG o posibleng moubos depende sa lihok sa presyo niini sa global market.
Gidugang niya nga mikunhod usab og 100 dollars kada metric ton ang presyo sa crude oil, apan magdepende gihapon sa mga sunod nga kalamboan sa Middle East ang mahimong dagan sa presyo sa LPG sa umaabot nga mga bulan.
Nahinumduman nga misaka og 4.50 pesos ang presyo sa LPG niadtong Nobyembre human mosaka og 46 dollars ang contract price nga gipahibalo sa Saudi Aramco.
Apan dili tanang brand sa LPG ang mipatuman og dugang presyo tungod sa kompetisyon sa merkado.
Samtang, giklaro ni Ty nga ubos sa bag-ong polisiya, ang Department of Energy na ang mopahibalo sa mga kausaban sa presyo sa LPG ug sa katugbang nga kantidad niini.
