Gipadayag ni Veronica “Kitty” Duterte nga nasuko ug nasubo ang iyang amahan nga si kanhi Presidente Rodrigo Roa Duterte tungod sa giingong pagpanglutos sa iyang mga kaalyado ug mga tigpaluyo.
Matod ni Kitty, nasagmuyo ang kanhi presidente tungod kay ang kwarta sa mga magbubuhis gigamit alang sa pagdakop sa iyang mga kaalyado ug supporters imbes nga ipunting sa mas importanteng panginahanglan sa nasud.
Lakip sa iyang gipasiugda ang pag-atubang sa epekto sa El Niño, mga proyekto sa flood control ug pondo alang sa batakang panginahanglan sa mga Pilipino.
Nahisgotan usab ni Kitty ang giingong P50 milyones nga pabuya alang kang Senator Ronald “Bato” dela Rosa, nga usa sa mga kaalyado sa iyang amahan. Apan wala pa kini makumpirma sa mga nag-unang media outlet.
Si Dela Rosa nag-atubang sa arrest warrant nga giisyu sa International Criminal Court (ICC) kalabot sa kampanya batok sa ilegal nga droga atol sa administrasyon ni Duterte.
Samtang, giawhag ni Kitty ang mga Pilipino nga magpabiling lig-on sa ilang baruganan batok sa mga giingong inhustisya nga giatubang sa nasud.
