Nagpasidaan si Ukrainian President Volodymyr Zelenskyy sa posibleng bag-ong pag-atake sa Russia batok sa energy sector, mga tulay tabok sa Dnipro River ug uban pang imprastraktura nga gigamit sa mga sibilyan sa Ukraine.
Sa iyang televised evening address kagahapon, Nobyembre 6, gibutyag ni Zelenskyy nga nakadawat sila og intelligence report kalabot sa giplanong pag-atake sa Russia.
Matud pa niini, nag-andam na ang Ukrainian Air Force ug Army sa pagdepensa sa nasud, apan dili sayon ang ilang sitwasyon.
Gipadayag usab ni Zelenskyy ang panginahanglan sa Ukraine sa dugang nga Patriot missile interceptors aron mapalig-on ang ilang depensa batok sa mga pag-atake sa Russia.
Gihangyo usab niya ang mga kaalyadong nasud nga dili langanon ang paghatod sa mga gisaad nga kagamitan, ilabina samtang nag-atubang ang Ukraine sa laing lisod nga tingtugnaw tungod sa padayong pag-atake sa ilang energy infrastructure.
