SARANGANI- Naghatag og kinatibuk-ang P4 million nga pinansyal nga tabang ug nagkalain-laing kagamitan ang Provincial Government of Sarangani ngadto sa 40 ka barangay sa pito ka lungsod sa probinsya aron mapalig-on ang serbisyo ug matubag ang panginahanglan sa matag komunidad.
Gipangulohan ni Governor Rogelio “Ruel” D. Pacquiao ang turnover ceremony niadtong Nobyembre 3 sa JLC Lobby sa Provincial Capitol pinaagi sa Ronda Probinsya-Sarangani Barangay Affairs Unit.
Ubos sa Socio-Civic Projects Fund – Bawat Barangay Makikinabang Program sa Office of the President, nakadawat og pinansyal nga tabang ang 20 ka barangay, 240 ka solar light sets alang sa 24 ka barangay, 255 ka monobloc chairs alang sa pito ka barangay ug 35 ka rolyo sa one-inch high-density polyethylene water pipes alang sa tulo ka barangay.
Gipasiugda ni Governor Pacquiao ang kamahinungdanon sa padayon nga panagtambayayong sa provincial government ug mga opisyal sa barangay aron masiguro nga makatubag sa aktuwal nga panginahanglan sa mga residente ang mga programa sa gobyerno.
Tumong sa maong inisyatiba nga madugangan ang mga kagamitan sa barangay, mapalambo ang mga pasilidad ug mapalig-on ang paghatag og serbisyo sa mga komunidad.
Mitambong usab sa kalihokan si DILG Sarangani OIC-Provincial Director Ian Jon S. Clemente, Board Member Joseph M. Calanao, mga opisyal sa lokal nga panggamhanan ug Accredited Community Disaster Volunteers.
