Nagpagawas si Presidente Ferdinand “Bongbong” Marcos Jr. og bag-ong Executive Order (EO) nga nagtakda og mga giya alang sa suspensyon ug pagpadayon pag-usab sa mga klase, mga kalihokan sa eskwelahan, ug trabaho sulod sa mga institusyon sa edukasyon ug mga sentro sa pagkat-on.
Subay sa bag-ong mando, ang suspensyon ug pagpadayon pag-usab sa mga klase ug trabaho mahimong ipatuman nga awtomatiko base sa mga gitakdang teknikal nga sukaranan.
Nagpagawas si Presidente Ferdinand “Bongbong” Marcos Jr. og Executive Order No. 130, nga naglatid og bag-ong mga giya alang sa suspensyon ug pagpadayon pag-usab sa mga klase nga face-to-face, mga kalihokan sa eskwelahan, ug trabaho sulod sa mga pampubliko ug pribadong eskwelahan.
Ubos sa bag-ong mando, ang mga eskwelahan mahimong modesisyon nga suspindihon ang mga klase nga face-to-face base sa tinuod nga risgo sa kaluwasan sa mga estudyante ug kawani, bisan pa kon walay mando sa suspensyon gikan sa nasyonal o lokal nga gobyerno.
Gitugotan usab ang mga eskwelahan nga ipadayon ang mga klase nga face-to-face bisan pa kon adunay gipatuman nga suspensyon sa ilang lugar. Hinuon, kinahanglan una nilang sigurohon nga luwas alang sa mga estudyante ug kawani ang pagtambong, ug kinahanglan usab nga makuha ang pagtugot gikan sa hingtungdan nga lokal nga ehekutibong opisyal (local chief executive).
Dugang pa, ubos sa EO 130, ang suspensyon sa mga klase nga face-to-face wala nagpasabot nga awtomatikong mohunong ang pagkat-on. Gimandoan ang mga eskwelahan nga ipadayon ang pagtudlo pinaagi sa alternatibong mga pamaagi, kung mahimo.
Ang maong mando nag-usab usab sa Executive Order No. 66, serye sa 2012, nga naglatid og mga giya alang sa suspensyon sa mga klase ug trabaho sa mga opisina sa gobyerno atol sa mga kalamidad ug dili maayong panahon.
Kahinumdoman nga ang Department of Education mihangyo sa mga lokal nga gobyerno nga maghatag og mas espesipikong detalye mahitungod sa mga suspensyon nga ilang ipahibalo, aron mapanalipdan ang oras sa pagkat-on sa mga estudyante.
