Naglusad og limitadong pag-atake ang Estados Unidos sa Qeshm Island sa Iran, duol sa Strait of Hormuz, agig tubag sa pagpabuto sa Islamic Revolutionary Guard Corps o IRGC batok sa usa ka eroplanong militar sa US.
Gipahibalo sa Iranian state news agency nga nakarekord og sunod-sunod nga pagbuto sa maong isla niadtong Lunes samtang nagpadayon ang tensyon sa maong rehiyon.
Nahitabo ang insidente sa wala pa ang midterm elections sa US, diin nagkagamay ang suporta alang kang US President Donald Trump ug nanawagan ang iyang partido nga tapuson na ang gubat nga nagsugod niadtong Pebrero.
Gipahayag ni Trump nga dili siya magdali sa dugang nga pagpalig-on sa mga pag-atake batok sa Iran tungod kay naparalisa na matod pa sa US ang ekonomiya sa maong nasud.
Apan gibutyag sa presidente nga posibleng targeton sa US ang pasilidad nga gitawag og “Pickaxe,” nga may kalabotan sa nuclear programme sa Iran ug posibleng mahuman ang operasyon sulod lamang sa usa ka oras.
Samtang, gipahayag ni Iranian Foreign Minister Abbas Araghchi nga adunay hugot nga negosasyon nga gihimo pinaagi sa tabang sa mga mediator, apan andam gihapon ang Tehran sa pag-atubang sa sitwasyon pinaagi sa diplomasya o aksyong militar.
