Gipaklaro ni Police Colonel Allen Rae Co, hepe sa Public Information Office sa Philippine National Police (PNP), nga karaan na ang mikaylap nga litrato sa social media nga nagpakita kang Sen. Ronald “Bato” Dela Rosa uban sa pipila ka indibidwal sulod sa usa ka sementeryo.
Sumala kaniya, kapin na sa tulo ka tuig sukad kini kuhaa.
Ang maong pagpaklaro human sa pagkaylap sa litrato sa social media sa Kalag-Kalag, nga hinungdan sa mga espekulasyon nga nakita pag-usab ang senador sa Digos City, Davao del Sur, taliwala sa padayon nga pagpangita kaniya sa mga awtoridad.
Nasayran nga padayon pang gipangita sa mga awtoridad si Dela Rosa kalabot sa arrest warrant nga gipagawas sa International Criminal Court (ICC) tungod sa giingong crimes against humanity nga may kalabotan sa kampanya batok sa ilegal nga droga o war on drugs sa miaging administrasyon.
Nagpahibalo usab ang Department of the Interior and Local Government (DILG) nga adunay P50 million nga reward alang sa bisan kinsa nga makahatag og impormasyon bahin sa nahimutangan sa senador nga makatabang sa iyang pagkadakop.
Sa pagkakaron, wala pa gihapon masayri sa kapulisan ang eksaktong nahimutangan sa senador.
