Giaprubahan sa Department of Labor and Employment kon DOLE ang pagpatuman sa dugang-sweldo alang sa mga ‘minimum wage earners’ sa Western Visayas o Region 6 ug SOCCSKSARGEN o Region 12.
Sa Region 6, mosaka og P40 hangtod P45 ang inadlaw nga sweldo sa mga trabahante nga ipatuman sugod Nobyembre 19, 2026.
Dugang niini, makadawat usab og P500 nga dugang sa ilang binulan nga ‘minimum wage’ ang mga kasambahay o ‘domestic workers’ sa tibuok Western Visayas.
Samtang sa Region 12, gilauman nga mokabat sa P41 ang kinatibuk-ang dugang sa inadlaw nga sweldo sa mga empleyado sa pribadong sektor nga ipatuman sa duha ka hugna.
Ipahigayon ang unang hugna nga adunay P16 nga dugang-sweldo sugod Nobyembre 19, samtang ang nahibiling P25 ipatuman sa Enero 1 sa sunod tuig.
Makadawat usab og dugang nga P450 sa ilang binulan nga sweldo ang mga katabang sa SOCCSKSARGEN aron makatabang sa ilang inadlaw nga panginahanglanon.
