Nanawagan ang mga biktima ‘war on drugs’ atol sa administrasyon ni kanhi Presidente Rodrigo Duterte sa administrasyon ni Presidente Ferdinand ‘Bongbong’ Marcos Jr. nga ipatuman na dayon ang arrest warrant nga gipagawas sa International Criminal Court (ICC) batok kang Sen. Bato Dela Rosa.
Sumala kang Atty. Gilbert Andres, ICC Common Legal Representative for Victims, ilang gipangayo nga dakpon na ang maong senador.
Gawas sa pagdakop, nanawagan usab ang mga biktima sa gobyerno nga itugyan na si Sen. Dela Rosa ngadto sa ICC sa The Hague, Netherlands.
Sa pagkakaron, padayon pang gipangita sa mga awtoridad ang senador human mogawas ang arrest warrant gikan sa ICC.
Samtang, nagbutang na og P50 million nga reward ang Department of the Interior and Local Government (DILG) alang sa bisan kinsa nga makahatag og impormasyon nga makatabang sa pagtino sa nahimutangan sa senador.
Apan sumala kang Atty. Andres, mahimong ikonsidera nga epektibo ang mga lakang sa gobyerno kon madala na gyud si Sen. Dela Rosa ngadto sa ICC.
Si Sen. Bato Dela Rosa usa sa mga ginganlang co-perpetrator ni kanhi Presidente Rodrigo Roa Duterte sa kaso nga crimes against humanity nga giimbestigahan sa ICC kalabot sa implementasyon sa kampanya batok sa ilegal nga droga o ‘war on drugs’.
